Recursos naturais e formas de propiedade: unha aproximación económica

Abstract

[Inicio] Na economía dun país, os recursos naturais veñen xogar un dobre papel: como fonte de alimentación, materias primas e enerxía, e como capital natural e, polo tanto, fonte de riqueza futura. Historicamente, desenvolvéronse diversas actividades económicas na primeira dirección. Son os casos da agricultura, pesca, explotacións forestais, minaría ou sector enerxético. Nelas, o recurso natural percíbese como input nos procesos produtivos (se vai ser obxecto de transformación) ou, como ben final de consumo (se chega directamente ao mercado). Por outra banda, socialmente apréciase cada vez máis a dotación de recursos como un patrimonio natural. Este patrimonio será tanto máis rico canto maior sexa a biodiversidade, permitirá mellores rendementos canto máis se manteña o equilibrio en cada ecosistema e poderá contribuír ao benestar dos cidadáns canto mellor sexa a calidade ambiental. Nesta perspectiva, valoramos non só as xeracións presentes senón tamén as futuras, que se beneficiarán dun legado natural en mellores condicións. [...]